ا


    المهم يا أبنى الانقليزى

    شاطر
    avatar
    سلطان الزمان
    فارس جديد

    عدد الرسائل : 46
    تاريخ التسجيل : 29/12/2007

    lol المهم يا أبنى الانقليزى

    مُساهمة من طرف سلطان الزمان في الأحد 7 ديسمبر - 11:27

    [ من الاشياء التى زكرياتها باقية وكل ما تذكرتها ضحكت كثيرا ===اليكم القصة
    جاء رجل الينا فى الكلية وكان شكلة سودانى ويلبس جلابية سودانية قابلناه فى الكلية طبعا سلام حار وبالأحضان
    الرجل---والله عندى ولدى فى كلية الأسنان معاكم جاى اشوفه
    أنا----- اسمو منو
    الرجل---قال اسم سريع جدا لا أذكر تماما ولكن كان يقينى ان هذا الاسم غير موجود فى المبنى الطبى ولكن واصل الكلام
    الرجل---انا برسل له قروش كتيرة حوالى 300 دولار كل شهر ولكن عرفت من ادارة الكلية انه لا يحضر وانا زعلان عاوز اشوفه بيمشى وين وانا طبعا شغال قى الامارات
    انا-- طلعا اخذتنى الهاشمية ورديت بصراحة الاسم دة اصلو ما سمعنا بيه لكن احتمال برلوم و قعد يزوغ عموما انت تمشى معانا البيت وترتاح وبعد المغرب انشاء الله نمشى النادى فى على بيك ونسأل عنه (كعادة السودانيين فى الترحاب) ----ذهبنا الى البيت وكان موجود معانا فى البيت دكتور الفاتح ادريس ودخل الرجل وأخر سلام و لباقة وقال طبعا انا عمكم مودرن لا تنزعجو فى وجودى معكم وكنا صراحة مفلسين ومركزين ماجى وأبوعديس ما قصر أبو الرجال ضربنا فى الوتر الحساس فجاة لقيناها جايب فرخة واتنبن كيلو لحمة ---طبعا انا والمعاى قلنا يا معلم ده فعلا مغترب وفعلا اكيد ولدو معانا رقم انا واثق انه لن تفوت علينا انه هناك طالب اسنان بهذا الاسم ولكن الفرخة واللحمة فى ظروف الماجى وابو عديس غسلت المخ تماما طبعا ضربنا اللحوم وتجشانا كما لم نتجشا من قبل واذدادت كمية المعادن والفايتمينات فى جسمنا ولكن كان هناك شئ غريب يراودنى لماذا هذا التعامل الغير عادى بادرته بسؤال من وين انت فى السودان قال لى أنا من المحس ولكنى قلت فى نفسى ايوا دى فرصة اتصلت بحبيبنا يحى خالد وقلت عندنا هنا واحد عاوزنك تتعرف عليه قال محسى طبعا يحى يعجبك فى الحاجات دى قشر الجاكت وما نسى ذلك الشال المشهور فى عنقة (الكوفية) وجاء مسرعا كانه استدعئ فى اجتماع يخص مصير السودان المهم الرجل سلم عليه وقال ليحى بالرطانة سلام ولكن يحى الخبير عرف ان اللكنه مفتعلة وقال ليه بتعرف الرطانة كويس ردالرجل المهم الأنقليزى يا ابنى (هههههههههههههههههه) ودكتور يحى لا يزال يذكر هذه العبارة ويحكيها بطريقته الكوميدية الساخرة ----المهم يا اخوانا يحي حزرنا من هذا الرجل وانا زعلت منه قلت له انا ما شايف نبالغ الى هذا الحد صاح الرجل شوية شاكين لكن ما ممكن نقول ليه فى وشه كده انت بتاع لف ودوران المهم تانى يوم مشيت الكلية ومعاى الشلة ورجعنا البيت لقينا التلفزيون وهو أهم اثمن شى عندنا قد سرق طبعا انا شخصيا ضحكت حتى الدموع وشر البلية ما يضحك لاننى راجعت التفاصيل والمقابلة فى الكلية واللحوم المهم مشيت النادى مسرع بعد المغرب لكى أسأل ان كان شافو زول وأنا مليان بشكل غير عادى ليس لاننا اتسرقنا فقط لان عمنا دا قرتصنا وشيلنا القفة أذا افاجاء فى النادى واحد من كلية التجارة واقف يحى نفس القصة حصلت ليه فرخة و2 كيلو لحمة وتلفزيون سرقو وهو زعلان بيسأل من الرجل لانه مثل معهم نفس الفيلم المعانا الظاهر بعد ما مشى مننا فى نفس اليوم بس الفلم التانى كان سريع عشان يهرب وأختفى ولم نره بعد وما عرفنا دا كان شنو ولكن يا اخوانا الدرس المهم هو
    انا زعلى راح نهائى عندما عرفت ان نفس الطيارة التونسية دى ركبها معاى زميلنا خريج التجارة ده وقلت الحمد لله فى ناس زى فى الدنيا دى أذن عادى -----وذهبت البيت وانا مرتاح ----أما الأن فهى ذكرى حلوة بقيت بينى وبين يحى والفاتح وباقى الشلة والى لقاء فى خاطرة اخرى يا احبابى smoke ]


    عدل سابقا من قبل سلطان الزمان في الإثنين 8 ديسمبر - 12:37 عدل 3 مرات
    avatar
    ملهم كردفان
    SiteAdmin
    SiteAdmin

    ذكر عدد الرسائل : 2225
    تاريخ التسجيل : 28/09/2007

    lol رد: المهم يا أبنى الانقليزى

    مُساهمة من طرف ملهم كردفان في الأحد 7 ديسمبر - 11:32

    مبااااااااااااااالغه لكن Laughing
    فى انتظارك يادكتور


    _________________
    السعاده وجبه متكامله لايلذ لك طعمها إلا إذا شاركك فى تناولها إنسان تعزه
    _______________
    القلب الابيض لابشيل جواهو سواد لابيعرف يسكت وقت قولة حق
    للإتصال بالإداره ...
    تليفون 00201095810923 [ندعوك للتسجيل في المنتدى أو التعريف بنفسك لمعاينة هذا الرابط]

    avatar
    أمين فاروق
    v i p
    v i p

    ذكر عدد الرسائل : 377
    تاريخ التسجيل : 07/12/2008

    lol رد: المهم يا أبنى الانقليزى

    مُساهمة من طرف أمين فاروق في الأحد 7 ديسمبر - 15:02

    فى انتظارك يا وديدي ما تطول الغيبة ..

    الفاتح سلامات ومشتاقين ياخ ..
    avatar
    أمين فاروق
    v i p
    v i p

    ذكر عدد الرسائل : 377
    تاريخ التسجيل : 07/12/2008

    lol رد: المهم يا أبنى الانقليزى

    مُساهمة من طرف أمين فاروق في الثلاثاء 9 ديسمبر - 22:41

    والله يا وديدي أخوي البركة فى الجداد واللحم ..

    حسع دحين أكان بعتو تلفزيونكم داك كان بجيبلكم سندوتش شاورما ؟؟؟؟

    Twisted Evil :pirat:

    طارق
    فارس جديد

    ذكر عدد الرسائل : 19
    تاريخ التسجيل : 09/12/2008

    lol رد: المهم يا أبنى الانقليزى

    مُساهمة من طرف طارق في الأربعاء 10 ديسمبر - 21:10

    والله ياسلطان زمانو ضحكتنى لمن بكيت...
    اصلى اول مره اخش الفلم ده....وكمان هندى
    لكن بينى وبينك الفراخ فى مواسم الجفاف والتصحر يخليك تثق فى الشيطان زاتو
    والبركه فى العضه ومص الخشم..والجاتكم فى تلفزيونكم سامحتكم
    avatar
    سلطان الزمان
    فارس جديد

    عدد الرسائل : 46
    تاريخ التسجيل : 29/12/2007

    lol برضضو زوق يا طارق يعنى عزرتنى

    مُساهمة من طرف سلطان الزمان في الخميس 11 ديسمبر - 19:12

    طارق كتب:والله ياسلطان زمانو ضحكتنى لمن بكيت...
    اصلى اول مره اخش الفلم ده....وكمان هندى
    لكن بينى وبينك الفراخ فى مواسم الجفاف والتصحر يخليك تثق فى الشيطان زاتو
    والبركه فى العضه ومص الخشم..والجاتكم فى تلفزيونكم سامحتكم
    smoke لك الود اخى طارق للمرور
    أولا يا طارق الحمد لله عزرتنى وخاصة انا اسمى ( ملك العضة)
    وديدي
    avatar
    زائر
    زائر

    lol رد: المهم يا أبنى الانقليزى

    مُساهمة من طرف زائر في الجمعة 29 مايو - 11:03

    زولك ده يا وديدي هو ذاتو المقلب ناس حسام بتاع حقوق وعادل الخزين والرشيد السنوسي .. طبعاً مصطفى الخليفة هو الجاب ليهم الزول ده ولد شيوخ وزول كريم وصاحب ضيفان اها الزول قام في الصباح بدري وفرتق بالتلفزيون الملون .. وبرضو قاليهم ولدي في كلية طب وهو جاي من السعودية المهم غرموهم حق التلفزيون اها بعد فترة بسيطة مصطفى الخليفة لقى زول سوداني رايح في المحطة لكن ده كان بالفعل مقطوع وصادق مش حرامي من ناس دارفور ديل قال كان ماشي اسكندرية ونزل بالغلط في طنطا وهو ما عنده قروش .. اها جراهو ود الخليفة للشقه فقام الرشيد رفض تماماً انه الزول يبيت في الشقه وطرده وزعل الراجل زعل شديد .. أها والله تصدق يا وديدي لقاني أنا في شارع البحر وهو قاعد في نص الشارع وخاتي يدينو في راسو شفتو سوداني وكشكلو غريب طوالي مشيت عليهو قلت ليهو مالك يازول رد علي بي نرفزه بان الطلبه هنا ناس مش كويسين وزعلان ما قادر يتكلم قلت ليهو ابشر بالخير .. طبعاً عامل حسابي من أفلام التلفزيونات القديمة لكن برضو الواحد مش ممكن يعمم على الكل حاورت الرجل شويه ومن كلامه عرفت بانه زول صادق طبعاً اخوك مادقوسه زيكم .. سقته بي تاكسي وديتو المحطة وشلنا جواز سفره كان مرهون في فندق قعد فيهو بالدين ورهن الجواز عشان قال ممكن الطلبة يديهو سلفة اها دفعت عشرة جنية لي فندق في المحطة وحق التاكسي وقطعت ليهو تذكرة للأسكندرية واديتو حق مواصلات زيادة والله يا وديدي الزول قلدني وقعد يبكي .. وقال لي ليه إنت صدقتني .. قلت ليهو يا إبن العم في زول جاء قبل فترة وعمل لي الطلبة حركات مش كويسه وسرق تلفزيونات وعمل مشاكل فعذرا وماتزعل وانا في النهاية زول من الطلبة ديل ونحن واحد .. أصر يعرف انا دفعت كم وحسب المبلغ وقال لي بكرة بجيك من اسكندرية أرجع ليك قروشك تقريباً كانت سبعة عشر جنيهاً طبعاً المبلغ كان كبير لكن لحظتها كنت صارف شيك وقلت ده رزق الزول ده أها رغم إني دفعت المبلغ لله ولم انتظر رجوعه لكن الزول بالفعل رجع دار الإتحاد في اليوم الثاني ومعاهو اخ من جامعة اسكندرية وشكروني ورجعوا لي القروش .. فتعميم الشر شئ حينظلموا فيهو ناس مساكين لكن يا وديدي الحرص واجب وتلفزيون بي ثلاثمائة جنية في الوقت داك مصيبة تجيب ليك اسهال شهر .. سعيدين بي شوفتك والشباب الحلوين ديل تحياتي للجميع معكم
    avatar
    زائر
    زائر

    lol رد: المهم يا أبنى الانقليزى

    مُساهمة من طرف زائر في الجمعة 29 مايو - 11:28

    يحي خالد من الناس المرحين جداً وكنت بتكيف اتونس معاهو .. يديك كلمة بالرطانة وواحدة بالعربي .. طبعاً أصل امي من المحس من سبو وبعرف شويه من كلام المحس كان يحي كلما يقابلني يرطن معاي كم كلمة ويقول لي إنت ليه ما عايز تنضم لي رابطة حلفا السكوت أقول ليهو يا يحي انا ابوي دنقلاوي لو قامت رابطة المهدي دنقلا حأشترك لكن معاكم ماعايز الراجل بمشي مع ابوهو مش مع امو .. والله يحي بقى كلما يقابلني يقول لي نفس الكلام ويعيدو تاني أقول ليه يا يحي انت كلمتني قبل كده يقول لي كلمتك بالله والله نسيت يحي عنده حتات في نص الكلام كده رهيبه ووقفات ما تخلص وضحكات يميل معاها لي ورا رهيبة ويعضي ليك شلفوته التحت ويجر نفس خفيف من سيجارتو نفس بعرفو براهو وماشفت زول بيجر نفس وينفخ دخان زي يحي خالد بي حنيه شديدة وبعدين يفتح ليك موضوع ويخرم ليك في موضوع تاني .. لكن كان عندي مواقف لذيذه .. وكثيرة جداً ..أخ عزيز وحبيب يحي خالد الله يهنيه يا رب .. طبعا استمرت بينا العلاقه كويسه لحدي ما شلت منو شرايط لي وردي حوالي خمسه شرائط اها انا مهمل وزول مكوجن ساكت مارجعتها ليهو تاني والشباب من شقتنا لحسو بعض الاشرطة والطيب كوكو قطع ليهو شريط بي مسجل سجم رماد كده اها يحي بدأ يسكني ارجع الاشرطة وانا اماطل ماعايز اقول ليهو مافي .. اتسرقت واتقطعت يعني بح .. اها لمن خلاص زنقني قلت ليهو الحقيقة والله قلب على جنس قلبه وبقى يفتح لي وما يسلم على ويقول لي انت ضيعت الاشرطة المهة حقتي وانا اقول ليهو والله يا يحي انا اغرم ليك حقهم هسه يقول ليك المشكلة لايقدروا بثمن ديل اشتري بدلهم من وين لحدي ما كرهني قلت ليهو يا يحي انا اعمل ليك شنو لكن .. قروش مارضيت تشيلها يعني اجيب ليك من وين شرايط زي حقاتك ديك اها سخن النقاش يناتنا قام هو عمل زعلان وفتح لي واخوك يعجبك في الحتات الزي دي فتحت لي حنانو ذاتو رغما عن اني غلطان لكن هو مسخها اها جاء وردي لي طنطا وعمل حركاتو البايخه ديك وزنق يحي على قروش الحفلة ورفض يشيل القروش الموجوده كره يحي وردي كراهية شديده واداهو كلام زي السم خارج المسرح ودفعت مها المبلغ الباقي لكن يحي كسر كل اشرطة وردي ورفض يسمعو تاني اها رجع علافتو معاي تاني لزوال سبب الزعل بعدين وردي احتكيت بيهو شخصيا في كم موقف طبعا هو ساكن صنقعت زول جلف ويديك في ميتينك طوالي وقعت كورة جوه بيتو في ميدان جنبو كنا لاعبين فيهو مباراة سمعنا كل دراب وشرط الكورة بعدين شنو شال الشريط بتاع الحفلة الكانت في طنطا ورفض يديهو لي يحي ويحي يقول ليهو يا استاذ وعدتنا بالشريط قال ليهو عشان بكره القاهو مالي السوق .. يحي زول حريف ومضحك لو قالبتو يا وديدي بالله تحياتي له تقريبا هو كان ساكن جنب سوق الشجرة يعني في طريقنا لكن هسه سكن وين ما عارف تحياتنا له .. انت عندك اخوك ماعارف ممكن سامي وديدي يمكن فابلتو في منتدى كده يمن بناع بلدنا والله نسيت لكن اتذكرتك بيهو في وقتها

      الوقت/التاريخ الآن هو الأربعاء 18 أكتوبر - 3:03