ا


    الخرائط اندهاش

    شاطر
    avatar
    زائر
    زائر

    الخرائط اندهاش

    مُساهمة من طرف زائر في الإثنين 13 يونيو - 6:52

    صمتك حنين الواطه
    لحبه حنين..
    بزوغك يا وطن هجرة وسفر..
    حبك محكر في الدواخل ضفتين...
    والحلوق مسكت لهاة السكه
    من صبرك سماد
    لواطه تفتح ضلفتين..
    لو بس يروح حزنك ويرحل للابد..
    الدراويش والذكر..
    والتقاسيم اللي مرقت
    بيوتات الفريق..
    والليل قرابين لمداد قدرة مدد..
    والشوارع مرقت ترتب
    في الخطيوات الصباح..
    لوطن مسروق ومطعون
    ومحقون من قفاه سنين طويله..
    اه يا وطن..
    لوينبثق كل السراب..
    في خيط امل
    الكروش مليانه من شهقه طفل..
    لاخر احساس استلاب..
    الكروش مليانه بحقي وحقك..
    حق المزارعيه الغلابا..
    حق شعب مسكين ..
    متوسد اللقمه الحلال..
    الكروش مليانه بحقي وحقك..
    حق ست شاي ..
    مسكينه تلعق في الصبر..
    حق طفل ورنيش
    مادي صبره
    علي الخرائط اندهاش


    عدل سابقا من قبل رشيدة عثمان فقيري في الإثنين 13 يونيو - 7:09 عدل 1 مرات
    avatar
    زائر
    زائر

    رد: الخرائط اندهاش

    مُساهمة من طرف زائر في الإثنين 13 يونيو - 7:04

    avatar
    زائر
    زائر

    رد: الخرائط اندهاش

    مُساهمة من طرف زائر في الإثنين 13 يونيو - 7:08

    2
    كل الحروف الحايمه في الخاطر تجول..
    واللسه واقفه علي حس السفر..
    مكتوبه حتما في الوطن.
    ..الليل محكر بالسكات.
    وفي الصباح كيمان حزن ..
    ...مطليه بلون المدن ااواقفه
    لسع في الرصيف..
    راجيه المطر حبه هواء
    والدنيا صيف ..
    والنيل هدير صمته انتحل
    والواطه بس جوطه وكلام..
    والدهشه ترفس في الوحل ..
    والناس بتسال عن رحيل ..
    وانهد حيل ..
    حبل التنهدفي فصام..
    والوطن عكرة محطات السفر
    لحته جوة الاذدحام...
    avatar
    ملهم كردفان
    SiteAdmin
    SiteAdmin

    ذكر عدد الرسائل : 2225
    تاريخ التسجيل : 28/09/2007

    رد: الخرائط اندهاش

    مُساهمة من طرف ملهم كردفان في الأربعاء 15 يونيو - 0:13

    رشيده عثمان فقيرى
    أهلاً وسهلاً ياألف مرحب
    طلتك والا القمر ...ياعروس الرقه والجمال
    أهلاً أستاذه الحرف المتفرد الجميل الأصيل
    ...
    البسطاء الفقراء المعدمين ..هم أساتذه المشاعر الصادقه والتعابير الموغله فى الوطنيه هم مرآة واقعناومداد حروفنا
    والكثير الكثير من منتوج دواخلنا

    احترامى


    _________________
    السعاده وجبه متكامله لايلذ لك طعمها إلا إذا شاركك فى تناولها إنسان تعزه
    _______________
    القلب الابيض لابشيل جواهو سواد لابيعرف يسكت وقت قولة حق
    للإتصال بالإداره ...
    تليفون 00201095810923 [ندعوك للتسجيل في المنتدى أو التعريف بنفسك لمعاينة هذا الرابط]

    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:16

    ملهم كردفان كتب:رشيده عثمان فقيرى
    أهلاً وسهلاً ياألف مرحب
    طلتك والا القمر ...ياعروس الرقه والجمال
    أهلاً أستاذه الحرف المتفرد الجميل الأصيل
    ...
    البسطاء الفقراء المعدمين ..هم أساتذه المشاعر الصادقه والتعابير الموغله فى الوطنيه هم مرآة واقعناومداد حروفنا
    والكثير الكثير من منتوج دواخلنا

    احترامى


    تسلم كتير يا ملهم عساك طيب .
    انسانيتك تجبر الزول كتير علي التواصل
    كيفنك
    والفرح كان طعمه ناقص لعدم وجودك فيه
    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:17

    3
    احتملت الهجرة لغربه وعذاب
    شان هجرتك
    واحتسبت الفرقه من وطن الغلابه
    وارتضيت بقاهر الايام
    مع الزمن الرتابه
    واحتميت بالهجرة منك
    يا وطن كل البيبحثوا لحروفهم عن كتابه
    في تباشير الصباح
    لما مووووج نيلنا مويته
    وكب روحك جوة صمتي
    ومن هواك رشاني دابه
    التقيتك ذي اماني مسافرة
    من حر الكاااابه
    لموانئ جديدة طاله من
    وطنا خيوط صبابه
    وتفتح الامل البتاتي
    وتدي لاطفالنا لوحه
    مزيجها فرحه وروح دعابه
    احتميت من خوفي منك
    لفواصل دهشتك
    واحتملتك لما طال
    الروح سرابها
    وادعيت صمت الحروف
    واحتكرت الشوق مواعيد
    البنفسج طاله من اهات غلابا
    جوة شباك لوطنا الغالي
    سودان موسم بعلامات لسه دابه
    مديت شهيق انفاسي
    يا سودان عشان
    ارحل واجيك
    شايل فرح سودان جديد
    طوريه طين
    في كل وادي وكل غابه
    سودان جديد يمسح علامات الرتابه
    وتتبدل الاحزان فرح
    مسدول علي غيم الامل
    مكبوب علي صدرالسحابه
    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:18

    4
    الحروف الجايه من عمق التوالف
    ما كتيرة علي الوطن..
    الحبه مشيول ..
    جوة احساس الكلام..
    حين دفقت من الحنين..
    وانشري فيني النيل تساب..
    واتشرشر الرقراق محن..
    نورة بتئن........
    مصليه بصوت المدن..
    مسقيه بالخوف والسراب..
    والمقرن المشرور ضفاير في السفر..
    دابوا بيتاتي..
    بينادي للنيل والوطن..
    مشتاقه انا لحفنه تراب..
    لجبنه في ضل الضحي..
    عصريه في حوش من رمال
    ساقياهوا امطار الدعاش..
    وبديت احسسسسب في السنين..
    الطاله من شباك
    سهر..
    والنيل فتر من المشي
    وانشري قيف..
    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:19

    5
    امواج تصاوير
    وانحدار شوق لوطن
    معجون خطيوات اغتراب
    هجرة طيور في موسم الشوق
    الحلو من العذاب..
    واه يا وطن
    لو هد نخلك
    باشبوزق في ليل خفوت
    لو تستحي الاهات تفوت..
    مليانه خطوات الوطن بالعشم
    ما العنكبوت سر احتشاد
    صمت البيوت الساكن الله في حيطتها..
    وبديت اسبببح
    وفي عزاي حاجات كتيرة
    شفع فتاري
    لفحت احاسيسهم
    تلاطم موجات الم حد النخاع
    وكرعينهم اتشوشوت
    واتدفقت من الهجير
    والنيل ركع مرقت صلاة...
    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:20

    6
    حبه بتنوووم في الوجع
    تصحي بتلاقي الحب تصاوير للوصول
    صليت فروض السهو حين قامت
    مراكب الشوق...
    ما الفاتحه بابها قبل امل
    مديت بواكير اشتهاي
    لحته جوة الاحتمال
    قبال تهاجر في الافول
    وسلام كتير لشعبنا
    يمشي ويغطي قري
    وسهول
    والضوء حزم
    ما مل من سهر الخفوت
    في الامكنه..
    او هبش الاحساس
    اصابع ببكرة ما متيقنه..
    في كل حته الكضبوت والصهينه..
    بس لو نعس حس التعب
    ما مل سهري فيك يا وطن..
    القومه ليك..
    برسل حزم اشواقي ليك..
    برسل حروفي مدوزنه مكتوبه فيك..
    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:21

    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:23

    7
    سبحت ارسل في الامل
    حزمه رسائل ما شالها زول
    ساعي البريد ما خت طابع في التوارد
    الجوة في خاطر الدميرة
    ملح ملح حس الرحيل
    مطر مطر
    رزازه يرسل في الهديل
    لامن شرق حسي
    واتمطي خاطر الليل برق
    من السماء الثامنه
    ومرقت مراكب الشوق تحج
    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:25

    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:25

    8
    مشطت خاطر النيل صفيرة
    قلبت احساس الفتي
    ما طش قلب النيل سهي
    انشر احساس التسابيح في النهي
    تاوقت للنيل حين شرق حسه
    الرحيل..
    صوت البنيات مرقن عصر
    لحته في الجيران
    لمه بتسر ..
    ونسه بتشيل حبه هجيع
    اطفال مساحتهم حنين
    مشغوله باقواس قزح
    نيلين بلد مويه فرح
    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:27

    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:27

    9
    نعست احساس المني
    حين كب ضرع الليل حليب
    ودخلت في خاطر الوجع
    مديت حبال الاندهاش
    لنفس ذات كل الحروف
    الكابه كب
    سكك الحديد في عطبرة
    هجرة وطن
    شنطه صفيح
    شافع مرق عز الهجير
    رافض لعيشه الدردرة
    ما ودع امه وكت رحل
    حين طش حسه مرق براه
    ما حضرت امه قطع رحط
    (رهط)
    صوت القطر انهد هد
    والنارتحيض ما عطبرة
    بلد الحديد عمال بدقشوا
    في هجير لفحه وطن
    لضل يسور خاطرهم
    في الشافع اللسع مسافر
    وما رجع
    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:28

    10
    لو استبان الصمت
    في جواي واتمد مد
    اوجات قماري تقوقي
    بشوقها بالريد والحنين
    فوق نيل سجد
    قيفت حس الليل مطر
    بغربه نيل ابوابها سد
    عدادها مشغول حولالا
    قربانها سائل الله ود
    محريه في قلب المسيد
    الشال فلول الريد مدد
    متكيه في دفه طبول
    متيقنه لو طش نيل
    وانهد حيل( ما الله في)
    ما ياها قدرة حي تشيل
    وفوق للابد
    avatar
    زائر
    زائر

    رد: الخرائط اندهاش

    مُساهمة من طرف زائر في الأربعاء 15 يونيو - 1:29

    11
    سميت مواويلك حراز
    مديت مواعين المطر
    فسحه شوارعك
    طينه حنانك
    ومهرجانات العشم
    دفيق رزاز
    لحته جواي تنهزم
    وكتين اشر نغماتي
    في وجه الحزن
    وارحل مقسم بيك
    مدن.
    مسكونه فيك
    حد الوجع
    اركان حنانك في انقسام
    النخيل واشجار دليب
    بيتباكوا من طول المسافه
    الشادة حيلها علي الرحيل
    اطفال مدارس وشخبتت
    سبورة في عز الهجير
    وقيع كلام
    والدنيا مركب مقلوب علي موج البحر
    والمويه رقراق لخواطر
    مرقوعه بصبر وامل
    والليل وطن محموم هموم
    كتر الزعل
    غربل مواويل السكات
    نكهه سفر لحته جوة الانقسام

      الوقت/التاريخ الآن هو الإثنين 25 سبتمبر - 14:36